मैली ह्वेगे अकल रे जमाना

मैली ह्वेगे अकल रे जमाना

गंदुलू ह्वेगे हमारू समाज

नंगा ह्वेगयाँ मनखी

नि रय्यीं लाज शर्म रे जमाना

मखियत पर घुण लगिगे

भैचारा पर सेंटूलों कु किब्चाट मचियों च

नाता रिश्तों मा औपचारिकता मलहम लग्यों च

नि रेगे पीड़ा अप्डों की

अफुं तक सिमित ह्वेगे रे जमाना

मैली ह्वेगे अकल रे जमाना

घोर बार छोड़ी शहरों मा भाजण लाग्यां

एक कमरा मा दिन काटण लाग्यां

रोजगार त जनि होलू

लोगों की नजर मा परदेशी ह्वयाँ

कनि सूनी छोडीगे खोली तिवारी रे जमाना

मैली ह्वेगे अकल रे जमाना

ब्वे बाब, दाना बुडीयों कु कण तिरिस्कार हुनु च

अपणा रीती रिवाज को कण मजाक हुनु च

अपनी भाषा बोली बुन मा शर्म ओंदी

बीराणा संस्कृति नचे मार्डन बनिगे रे जमाना    

मैली ह्वेगे अकल रे जमाना

१० अप्रेल २०१३

गीतकार - : बलबीर रणा “भैजी”

© सर्वाध सुरक्षित